【這一生也在進取】張國榮精選推介

十首你一定要識嘅張國榮合輯(下)

Photo from Instagram

6. 追

追女仔有好多種方法,但自彈自唱真係無得輸!

《金枝玉葉》入面其中有段係哥哥自彈自唱《追》呢首歌,演繹得非!常!之!有感情!戲入面嘅靚靚就真係比哥哥冧到啦,仲講左句「你好叻呀~」,大家又有無睇過呢套戲?大家又有無比哥哥冧到?我相信大部份人學音樂係原因都係好膚淺,小編都係其中一個,來來去去都係離唔開想溝女呀,覺得型呀,呢一類嘅外在因素。但要將呢件事做得好好睇睇真係唔係咁易架葉師傅,靚仔彈得好聽就叫型,靚仔彈得差其實都無得救,咪又係一樣柒!唔知大家係邊一類呢?

彈得好嘅其中一個原因係需要有份靚靚仔仔嘅譜磅住,快啲撳入去睇下我地份譜啦。

7. 今生今世

你地有無聽過「動物管理員」?佢就係其中一個翻唱「今生今世」嘅人!

係啲咩驅使一個歌手上節目特登學廣東話唱廣東歌?係愛定係責任呀?小編覺得係回憶呀!原來前兩年曹格係「蒙面唱將」翻唱過呢首「今生今世」,而呢個節目一向以「面具」形式表演,呢樣野會令觀眾更專注喺首歌嘅編曲、歌詞同埋演繹上面,我相信又會令更多人認識張國榮嘅歌,認識哥哥呢個人吧。每一次聽到有外地人唱廣東話歌都有種莫名嘅感動,即使曹格有啲音唔正,我都係好欣賞佢!你估廣東話有九個聲調咁易講架咩?

「今生今世」只有一個張國榮,是無可取替的,聽完佢嘅歌你就會明。


8. 玻璃之情

哥哥最後的絕唱

這首算是哥哥最後的作品,成為了最後的絕唱。哥哥有表示過曲詞太「灰」,希望林夕可以略改。唔知道呢句野算唔算係一啲求救嘅signal?後來,林夕表示好後悔,佢填詞嘅時候並唔知道哥哥原來已經病得很嚴重,要是知道佢就唔會為呢首歌寫咁沉重的詞。那段時間,哥哥有對他的朋友透露過身體極度唔舒服,唔能夠正常工作。相信當時嘅人係缺乏對抑鬱症嘅了解,以為只係「好普通嘅唔開心」,「轉個頭就無事啦」,所以都無特別去關心。所以小編常說,多啲關心身邊嘅人,見字抱抱,見字攬攬,珍惜所有生命中出現嘅人。

一個唔覺意,玻璃就碎到一地都係,大家捉實左未?有興趣可以打開下面份玻璃之情既譜,感受一下有幾「灰」。

9. 最冷一天

你地嘅人生又有無經歷過「最冷一天」?

以為首歌係講天氣?錯啦!係同天氣係完全無關架,意境黎架咋!如果當自己係首歌嘅主角,呢首歌啲歌詞咁悲壯,好容易就感受到有幾「冷」。如果當哥哥係主角,我諗感受會再升華多一級。 依家聽最多嘅陳奕迅翻唱版本,無乜人會留意原唱係邊個,而呢首歌嘅原唱係哥哥張國榮。小編有「原唱情意結」,除非翻唱真係好好聽啦,唔係嘅話我都係會聽返原唱嘅版本。另外有一首同曲嘅歌叫《取暖》,係《最冷一天》嘅普通話版,大家有興趣都可以去聽下。


四月,係哥哥嘅月份,係呢到送上《最冷一天》嘅彈唱譜比大家。

10. 明星

原來哥哥唔係原唱?!

我知道哥哥好多首歌都係電視劇主題曲,呢首都唔例外。當年嘅電視劇集《明星》,最初主題曲嘅歌名係《當你見到天上星星》,原唱係張瑪莉(我以為原唱係張國榮),後來歌名改為《明星》,並且由一首情歌,唱唱下就變成一首自白歌同埋悼念歌。要話呢首歌係情歌定係悼念歌其實好睇聽歌嘅人諗緊咩,但用星星來做比喻真係咩都好 fit !唔知你地又點睇呢? 


雖然哥哥唔係原唱,但佢嘅版本實在無可取替,忍唔住都編埋譜比大家一齊欣賞!

十首你一定要識嘅張國榮合輯(上)
編輯
Hayley Wong
Editor