陳奕迅 【落花流水】

那份洶湧,唯有你可以駕馭|論 SINKER REDWOOD

落花流水|今次主角唔係落花,而係一棵樹

落花流水,相信大家都好熟,只係今次主角唔係落花,而係一棵樹。

呢一棵樹生於美國加洲北部嘅沿岸地區,自小就喺一個森林河邊嘅地方長大。佢聽同類講,佢哋有個學名叫 Sequoia sempervirens,係一個會長到好高嘅品種,二百三百尺高係等嘅閒事(高過中環個摩天輪)。由於咁大棵樹,人通常會拎佢地黎做家俬或者建築,所以佢自細好好奇自己嘅將來係點呢?到底會係變成分佈世界各地嘅木凳,定係一條長木橋?

就係咁,過咗幾百年。森林迎黎一場大雨改變咗佢嘅命運。場雨落足幾日幾夜,雨量大到河水氾濫不可收拾。終於將佢嘅根沖散咗,一不小心呢棵樹就跣底咗,跌咗落河了。幾百年嚟,佢見住幾多人係河邊撐船經過,但從來未想像過自己會有一日變成一隻漂流嘅巨型木伐。佢好驚,好掛住佢嘅朋友家人屋企,回頭一望先發現,原來大家都已經東歪西倒。家,早已不成家了。

一百年後|思念,原來早已刻骨銘心

好在最緊要嘅關頭,流水都係呢棵樹身邊陪住佢,帶住佢一路向前,一齊冒險,慢慢呢棵樹都習慣咗自己浪跡天涯嘅一生,而終於有一天,流水將佢沖入咗一個平靜湖底。呢棵樹同流水都相信,呢度就係佢哋新屋企。又過咗一百年,有一位漁夫嘅漁勾唔小心勾住咗水底嘅巨樹,潛落水嘅時候就發現咗佢啦,漁夫決定打撈佢出黎。呢棵樹好唔捨得流水,打撈嘅前一晚,流水同佢講:

「無論你去到邊,我一直都會係你個心入面,永永遠遠。」

呢棵樹只係將流水嘅說話當成安慰。第二天,打撈隊伍將佢由水底撈出黎了,一百年後呢棵樹再次重見天日,卻發現身邊有好多人圍住佢,彷彿見到稀世寶物。而呢棵樹終於發覺,和流水相處一百年來,水入面嘅礦物滲進木裡。一條條深淺粗幼不一,代表住佢地嘅每一次經歷嘅黑色木紋,成為佢嘅紋身同印記。

然後佢明白流水嘅說話,思念,原來早已刻骨銘心。

沉水紅木 Sinker Redwood|暖聲的極致

以上就係「沉水紅木」(Sinker Redwood) 嘅故仔啦。當然好多細節我都加入少少創作,但至少係真係有在水底超過一百年嘅經歷。而 Sinker Redwood 正正就係我手上呢一支,十周年紀念版《咫尺徘徊》嘅面板(註:不過呢塊 Sinker 唔係木紋極度分明嘅級別,係我親自聽過聲收貨揀出黎),配上玻利維亞玫瑰木做底側,放在薄體 Dreadnought 的設計上面。命名原因稍早另一篇文章提及過了,而其他細節都係同《十里桃花》一樣,稍後分開再講。

整體感覺,呢一把琴係墜手的,因為玻玫比較厚實同重身,加上用 D 型,拎上手係唔會有《十里桃花》OM 嘅輕巧,但又係咪代表佢好難駕御呢?咁又未必,主因係我將琴身嘅厚度減薄了,加上手枕位同埋特製嘅琴頸,令到呢一支結他彈起上黎,比一般嘅 D 型結他易彈多了(但排隊要試就冇《十里桃花》咁受歡迎啦,《十里桃花》基本上係女同學殺手)。

咁到底佢嘅聲明係點呢?一般其實主流結他面板主要有「雲衫」(Spruce) 同埋「雪松」(Cedar)。前者以清底同高頻為聞名,後者以暖底及低音見稱。而 Redwood 是大家比較少見的,佢嘅特性就係介乎兩者之間,有溫暖嘅低頻,亦因為比 Cedar 稍硬而有分明嘅高音。

Fingerstyle |唔單單只係有浪漫同溫柔

係我嘅風格入面,Fingerstyle 唔單單只係有浪漫同溫柔。好多歌都包含咗一種憤怒,一種洶湧嘅情緒。而呢個時候,就只有 Redwood / Cedar 嘅結他可以帶俾我呢一種迴腸蕩氣嘅感覺,得 Redwood 可以最傳神咁表達。

好似我以上彈嘅落花流水一樣 (CGDGBE),大家可以留意第六弦已經 drop 到去 C,而 Sinker Redwood 居然可以好分明嘅樣處理呢個低音,變成一個有層次嘅表現(換轉是 Spruce,低頻就算有足夠嘅量,都潛唔到咁深的),加上玻玫的厚實加長了這個低頻延伸,以及 D 型嘅空間感,令這個 C 弦的密度,有一種徘徊喺結他入面嘅感覺(換轉係一般嘅 spruce,不出三四秒個低音已經糊了)。而減薄嘅 D ,又同時幫助高頻更加突出。

兩支結他,兩種聲音|亦柔亦剛的境界

都係果句,呢一把都係好明顯偏重一端嘅性格琴,如果你諗住一支結他走天涯,咁你揀《咫尺徘徊》未必適合你杯荼。但我而言,分兩支結他嘅好處係除咗可以分別更傳神去演繹,更重要嘅係可以透過唔同嘅音色磨練自己嘅右手,先可以練到一個 「亦柔亦剛」嘅境界。

而最後,放得 Sinker Redwood 都唔方平啦係咪?喺《攻頂配置入門價錢》嘅重點下,限量嘅《咫尺徘徊》講緊只係港幣二萬幾。的確就算係名廠,呢種名貴木材都只係放喺一啲最高階,甚至限量版嘅結他入面,自己 search 下用上 Sinker Redwood 嘅 “Ryan Guitar” or “Lowden Guitar” ,前者二手差唔多兩萬美金 (係美金),後者全新也要九千美金;八月我會收到 Bourgeois 為我度身訂造嘅 Redwood DS12,都係呢啲價位,即係講緊,十萬八萬嘅價錢係呢種級數嘅等閒事。

一樣都係限量,亦只限學滿一年嘅學生認購。

編曲者
Long Fung Tam
Founder & Director
峰弦峰語創辦人,Bourgeois Guitars 官方指定 Artists。成日以為好得閒一日到黑彈結他然後結果做足廿四小時 Admin 嘅行政總監。
結他
品牌型號
Custom Funguitar Custom for Harry H.
桶型
Orchestra Model (OM)
面板
Lutz Spruce
底側板
Brazilian Rosewood
錄音資料
結他調音
CGDGBE
結他弦線
Pyramid Light Gauge
錄音器材
Neumann KM184 Stereo
錄音咪前級
Internal
錄音介面
Tascam UH-7000
混音
Long Fung Tam
歌手資料
陳奕迅