【keyboy's room】「唔開心邊有分大細㗎」

衛蘭 【It's Okay To Be Sad】cover

不快猶如雪球 愈滾愈大

已經連續三首係 Wyman 嘅作品!上兩次介紹嘅都係林家謙作曲嘅歌,今次介紹嘅曲係由另外一位超勁作曲人 Cousin Fung 寫的。由衛蘭主唱,呢首係一首越聽越好聽嘅治癒系歌曲。見到呢首歌嘅班底,就已經好期待。到首歌出嘅時候,咁啱嗰排都有啲低落,我就戴住耳機聽呢首歌,感覺好似衛蘭喺我側邊安慰我咁,個心舒服好多。

人越大,發覺自己越多時間唔開心,可能因為遇到嘅問題多左。但係就係呢段日子,教識我少少唔開心嘅心態。首先,一定要搵人傾下。就算知道 It’s OK To Be Sad,都唔好由得佢一直停留,因為佢會漸漸埋藏喺心底;持續一排之後,你會發覺不知不覺間你做事都好似冇咩動力,工作效率更加比以前低左好多。You can see where this is going,久而久之嗰啲屈埋嘅唔開心就會最終造成種種嘅情緒問題。所以簡單講,就係要治本,源頭減廢。一個雪球本身好細,但係由佢慢慢碌。就會慢慢滾得好大,所以一有雪球就要掉走,唔好等個雪球滾大到你完全承受唔到,碌扁自己。有野啃著,就要同人傾下,唔好拖。千其唔好認定冇人明白自己,而唔去 reach out:There is always help!

截圖於 It's OK To Be Sad (MV 劇場版)

「唔開心邊有分大細㗎」

齋睇呢首歌嘅 MV,未必會明白成個故事,所以我建議大家一定要睇劇場版。當時自己睇嘅時候,一直都舒唔到壓,個心 keep 住哽住哽住。直到聽到片尾嘅一句,即刻好似放低左少少心上嘅重量。的確,尤其是男仔,其實有時唔開心嘅時候都會覺得自己好廢,心臟唔夠強大,又或者唔太習慣講出嚟。特別係當你身邊嘅家人/朋友都經歷緊啲「 real deal 」都能夠保持開朗,你就會更加覺得自己唔應該唔開心。但係呢種怪責自己,只會令自己更唔開心,令到個雪球冇啦啦又變大左。最近聽過一位好友分享,佢話其實每人遇到嘅 challenge 係公平嘅。毋用去比較,just carry on ~

最後,loop 左幾個禮拜,最大嘅感覺就係:呢首歌嘅信息— It’s okay to be sad,其實唔係淨係同唔開心嘅人講。同時,都係話緊比一啲冇唔開心嘅人聽,記得要睇睇身邊嘅人,時刻 check 下佢地 o 唔 ok,唔 ok 就留喺佢地身邊。好多時,你只需要一對耳,就救到一個人。


==============================

作曲:Ariel Lai / 衛蘭 / Cousin Fung
作詞:黃偉文
編曲:Ariel Lai@emp
監製:Edward Chan / Ariel Lai@emp / Cousin Fung@emp

==============================

Instagram: https://www.instagram.com/lokjustinchan/ 

Youtube: https://www.youtube.com/c/keyboy1225

==============================

編輯
Lok Justin Chan
singer-songwriter
singer-songwriter。00後老餅,全民造星II第五名。全職聽歌,兼職讀書。想組男團,又想做indie。鍾意R&B/Jazz/Funk,同時都鍾意Pop/Rock。