【結他教室】覺得自己彈極都唔好聽?

學習心得分享|十個學結他的難關(中)

Photo by Andrew Ly on Unsplash

學結他常見嘅卡關位(5-7)

如果你已經克服《初學結他常見的卡關位(1-4)》提過既四個難關,恭喜你,你已經脫離新手初學者嘅階段!睇返呢四個關於技術原因而卡難嘅解決方法。今次就黎到中篇,會傾下一啲進階啲既初學者所面對嘅問題。
【結他教室】初學結他常見的卡關位(1-4)

Photo by Jeswin Thomas on Unsplash

樂理好難啊!|結他學齡:半年

Photo by Jeswin Thomas on Unsplash
你知道樂理很重要,但又好怕去學,覺得又麻煩又悶好似無乜用咁? 但無學樂理,你彈嘅只係結他;學左樂理,先算係玩音樂嘅開始!你有無咁嘅經驗?剛背完譜一個月後,只記得一半,三個月後就完全忘記啦。這情況好似背書一樣,無理解過句子嘅意思,當然會背得痛苦。樂理,其實係音樂上嘅文法同語法,無注意樂理,又點彈出好東西呢?所以,我地既課程會隨着學生的技術既進度加入所需要嘅樂理知識,目的是令到每個學生最終都有能力編到有質素嘅結他Fingerstyle。你想唔想有一日可以唔洗睇譜彈奏?想唔想試下編一首自己鐘意、坊間又無譜既歌?如果想,就要好好對待樂理。

Photo by marianne bos on Unsplash

我仲有咩可以學?|結他學齡:九個月

基本技巧,已經練得唔錯,拎到份樂譜可以彈得似模似樣,但係可能會有種空虛感,呢種空虛可能係缺乏清晰嘅學習方向。音樂,甚至結他都係一個好大嘅世界,一定有更多技術和知識你可以學。要有心理準備,你投入嘅時間和努力會比之前更多,但亦會得到更大嘅滿足感!!

你有兩個大方向可以去學習。

一、樂理:音程、大小調、五度圈、和弦理論、其他音樂風格等。學習樂理同時,其實都訓練你耳朵和對音樂嘅敏感度。練耳由拍子開始,拍子>旋律>音程>和弦等,全都離不開對樂理嘅認識。在結他上應用樂理嘅知識,例如:音程係結他上係點表達嘅,不同調嘅旋律會在哪裡找到,一啲特別嘅和弦進行套用在不同調上可以點彈,如何為和弦增加extension等。 二、你可以向更高深嘅技術發展。percussion技巧,可以係彈奏和弦和旋律嘅同時,加入㪣擊節奏。同一支樂器可以同時做到Percussion和彈奏效果,只有木結他可以做到,亦係木結他近二十年來最多人研究嘅技巧。可以多學習幾位出名嘅木結他手包括Andy Mckey、押尾光太朗、松井祐貴、鄭晟河等Percussion結他嘅好手。

覺得支結他唔好聽!|結他學齡:一年

好既技術同好既結他比,一定係追求好既技術優先。但係有一支唔好聽嘅結他,你每天嘅練習係磨練;好聽嘅結他,你每天嘅練習就係享受。所以對自己好少少,買一支好㩒,又鐘意既結他,都係一種好既動力黎架。而且你係結他上面嘅投資其實係同你要學好結他嘅決心係成正比嘅,想像下如果你未來五年都會每日彈結他,你當然想佢音色好啦,如果當結他係你終身伴侣,就更加不用多講。而跟據哈利店長報告,我地嘅學生係買結他嘅時候會比坊間嘅客人預算會較高,第一當然係因為佢地既決心。第二就係因為一支音色好嘅結他會誠實地反映你嘅功力,音色既掌控,有無多餘嘅動作發出怪聲。好嘅結他就可以如實反映呢d細節,對你嘅技術會有好大嘅提升!

結他=伴侣|揀一支最配合你嘅好結他

好嘅結他首先要有良好嘅共鳴
木結他結構有三個等級,分別係全夾板、面單(solid top)和全單(full solid)結他。當中,全單板結他嘅共鳴係最好嘅。但唔代表全單板共鳴,就一定比面單結他好,經過精確調音嘅面單結他,會比無好好調音嘅全單結他音質來得更好。由音量、延音長度、聲音分離度等可以判斷結他嘅共鳴。有足夠嘅共鳴,就可以發揮木材原本嘅聲音。有啲木材會比較puchy,例如:cocobolo、pauduk,較柔和嘅有rosewood、walnut,聲音更清澈。結他嘅聲音,就好似唔同嘅個性,要配合你自己嘅個性、使用習慣。擁有一支心愛嘅結他,絕對會增加你每天練習嘅動力!

Photo by Daria Shevtsova from Pexels

今次就講埋一啲進階初學者會面對嘅難關,其實學結他卡關位都講得7788啦,「吓!?中篇咋喎?咁快講完,小編趕收工啊?!」um...我諗如果你已經解決咗以上既難關,已經證明咗結他對你黎講一定好重要,你需要嘅係時間嘅沉澱同磨練,小編都係努力中,就唔俾更多意見啦。而下篇會提到一啲屬於心態同個人原因嘅難關,純屬分享,我地下一篇再見。
編輯
Maxwell Law
Editor