Photo Credit to Editor's Friend
我只能夠說演唱會後勁非常凌厲，睇完show咁耐我個 playlist 都仲係到loop緊Rb…
實在係太正啦，我要將呢隊Band傳開去！我要感染所有我認識嘅人，所有經過係咁耳望一眼嘅人都要成為佢地嘅歌迷！（我希望係咁）
大家知唔知道 RubberBand 點解叫 RubberBand ？起初嘅意思係像筋，大約係想將一啲事物連結一齊，We Connected。後來，6 號話個名有「能屈能伸」嘅感覺。
佢地初出道時曾經講過覺得香港樂壇有太多情情塔塔的歌，自己應該唔會寫肉麻情歌架啦。又的而且確，佢地啲歌較勵志、正能量、振奮人心，啲歌詞又貼地，好容易產生共鳴，我相信你地會感受到的。
下面為大家介紹嘅歌排名不分先後（絕對無任何私心的），Rb有太多歌都好好聽，實在不能盡錄，但我地會繼續努力，亦都希望大家除左聽出名嘅歌之外，都會去聽下其他歌。
1. 發現號
我諗呢首 Rb 嘅代表作之一應該無人唔識掛？！有聽過 Rb 嘅都應該有聽過啦，個 feel 好亢奮架，其亢奮程度同吸毒係十分類似架！會好似中毒咁不停 loop Rb 啲歌 （利申我係無試過吸毒的，大家都唔好諗住試呀），我講到咁正你地仲唔快啲撳下面個掣去譜！
2. 阿波羅
對於呢首歌我想同大家分享一樣野，普遍流行曲嘅 Time Sig 都係 4/4 ，但呢首係 2/4 ，佢地有咩分別呢？4/4係一個小節有一個重拍三個弱拍或者一個重拍一個弱拍加一個次重拍一個弱拍，而2/4 就有一個重拍一個弱拍，大家可以聽準啲重拍去判斷首歌係 2/4 抑或係 4/4 。初頭我都會撈亂架，但後尾聽得多就識分了。大家都要接觸多啲唔同嘅歌，嘗試去拆解一下首歌嘅結構，千祈唔好停留係自己個框框入面呀！
立即撳入去睇下呢首歌同平時嘅4/4流行曲有咩分別啦。
3. 孤島人
當自己心情低落嘅時候可以聽下呢首歌，雖然曲風好輕快，但歌詞營造緊一種「避風塘」嘅幻象，好似掘緊個窿比自己匿埋咁，逃避現實又好，乜都好啦，Chur 左咁耐有時間都要抖下氣嘅，最緊要係識得出返嚟姐。
這地球太大，來吧拎起支結他高聲唱歌吧～
4. 未來見
演唱會個主題係意大利文「Ciao」，意思係你好／再見，對於所有人嘅去留，唔適宜評論太多。引用 Rubberband 出呢首歌時既一番說話，「不論將來那個世界是否還會善待我們、即使我們已經往最遠那個星球飛去，我們也約好了，未來再見」。我地一定會係未來再見，再聚，你話係唔係呀，哈姆太郎！
5. 夥伙
你有無試過，在求學時期內心最黑暗嘅時候，覺得非常難受同孤獨，然後一大班朋友同你吹水笑下笑下咁捱過最唔開心嘅 Moment？
你又有無試過，係啱啱投入社會工作嘅時候，遇到好多麻煩，然後同班Friend拎起啤酒訴苦講唔停？大家可以睇下Verse嘅歌詞「午夜再黑，不需要怕」，我希望你地可以記住呢種感覺，只要我哋嘅目標同信念係一致，你永遠都唔會係得自己一個人。而去到Chorus，係呢個時代，你需要嘅係更多嘅陪伴，可能係一班朋友，可能係素未謀面嘅陌生人，同時都可以係一首歌，等你一起執起結他，等呢首歌陪你一齊面對困境。