【冷知識】「電木結他」身世之謎?弦幾時先要換?

十個木結他的常見迷思(上)

淺談關於木結他的常見誤會

在練習同教學時都聽過不少「結他界都市傳說」,今集同大家淺談其中三個,希望幫到大家解決心中疑問!

Photo by Ethan Wu from Pexels

1.「電木結他」身世之謎|究竟係「木結他」定「電結他」?

不少初學結他既朋友都會問咩係「電木結他」,襯呢個機會簡介下其實「電木結他」並不屬於一種結他類別,真正身份係木結他,只係額外安裝左Pickup(拾音器),幫助擴大結他聲,可透過導線將訊號接駁音箱(Amp),就好似你唱歌時,加左枝咪收音咁,適合舞台/街頭表演/錄音等效果。「電木」外型/演奏技巧依然同木結他一樣,唔好誤會係彈「電結他」呀!無論買古典/鋼線結他,都可加裝pickup,變成坊間講既「電木」!

Photo from Andertons.co.uk

如何選擇「電木結他」|原裝pickup?

如選擇附有原裝pickup既電木 (價格較高),一般只配備較基本的型號,也有些附有tunner方便調音、EQ ( 等化器 )修飾高中低頻音色,雖說提供接駁音箱功能,但需留意音質參差。建議先選擇心水既結他聲,再額外選購pickup安裝。市面Pickup主要分為主動式與被動式兩類型,不同的收音原理和安裝方式令到音色各有風格,例如偏向電子聲/自然原木音色/立體度/清晰度等許多細節,將來再同大家分享。

Photo by Gezer Amorim from Pexels

2. 身型較細粒一定要買37吋?|手感是王道

有時聽到朋友買結他會以「結他幾多吋?」去揀結他。而我既建議係:你估揀電視咩?乖,親身拎上手試左先啦!對結他新手黎講,「手感」係買結他首要考慮!「手感」涉及結他body、琴頸闊度、弦距等因素。坊間所講既尺寸一般指琴頭最頂點到琴身最底邊的直線距離。事實上,因為結他有不同形狀的桶身設計,如OM/Dreadnaught/GA…直接影響右手擺放的舒適度,變相影響正確勾弦的姿勢,所以單憑用「尺寸」決定會墮入陷阱,練習時先發覺「中伏!彈落唔舒服嘅…」

Photo from [email protected]

3. 點解成日彈錯弦?|身型高大先揀D桶?

教學經驗:見過不少身型細小既同學其實拎起正常size結他,右手勾弦協調得無問題,反而拎較細的「37吋」結他時右手會不穩定滑向前,引致經常勾錯弦。個人經驗:以前錯覺係D桶好大舊,生得唔高搞唔掂點知有次拎住黑潮Full solid D桶試聲:咦?右手輕鬆喎!所以眼見未為真,琴身厚度、手枕位等細節都影響手感,都係果句,拎上手試啦!

Photo by Oz Seyrek on Unsplash

4. 結他斷弦先需要換弦?|唔換弦又如何?

「定期換弦」係保養結他最入門法則!當佢屋企床單咁,用耐左有汗漬記得換啦!弦線的新鮮度/音質由換上第一日開始下降,就算唔彈都會逐漸殘舊,而頻密練習亦會因手汗侵蝕加速生銹,除左影響手感、阻礙手指移動速度等技術問題,舊弦亦有損音色、清晰度、彈性下降引致「痴fret」雜音

Photo from freepik.com

5. 彈幾耐先換弦?|如何保養?

換弦頻率視乎練習方式。以筆者 Yo導師為例,雖未必每日練習,但因每次練習時間較長、或使用較多slidebarred chord,令弦線生銹速度較快,平均每月換一次。建議多嘗試不同種類的結他弦線,以配搭不同歌曲加強演奏特色。如需要錄音,亦建議換新弦以確保較佳音質!

一般建議:每天練習,每月換一次;不經常彈奏的,最好每三個月換一次。

保養Tips:
1)
想維持好音色,換弦時最好一次過換哂整套,避免新舊/不同牌子的弦線混合而損害結他結構。
2)避免結他受陽光及濕度影響,應擺放於結他盒/袋內,內放防潮包保持濕度45-55%
3)如果不經常使用結他,建議鬆掉所有弦線,減低tension對琴身的負荷。
希望大家睇完由今日開始好好保養結他,下集繼續拆解各種結他迷思,請密切留意!

編輯
Yoyo Yiu
Editor