精神健康關注組 - 「印堂發黑救星」新手錦囊

精神健康關注組 - 「印堂發黑救星」新手錦囊

我係店長哈利,除左賣嘢,日常工作仲包括見等上堂既學生,俾我相過嘅人,仲多過彌敦道對面啲睇相佬。接觸過咁多學生,發現有啲人上到嚟真係會有雙目無神、印堂發黑嘅狀態,一睇就知佢命不久矣啦,我係話學結他嘅生命。所以呢次就等我同峰弦導師軒sir一齊幫你睇下,到底係邊隻怨鬼纏住啦!!!

1. 速食鬼

「我要一個月之內,彈到XXXXX俾女朋友聽!」/ 「我三個月之內要學成結他伴奏!」

如果結他既重要性只係值兩三個月時間,你點會努力?三個月後彈到慘不忍睹,你反而會懷疑自己能力。彈結他同所有嘢都一樣,想彈到,又想彈得好就要認真對待結他,當佢係終身伴侶啦。

2. 是但鬼

「彈到咪得囉」、「跟拍子好難呀」、「我彈哂先跟拍子啦」

音樂好聽係因為佢嘅細節,拍子準繩度、勾弦角度、力度、左右手配合、指法等等,缺一不可。抱住玩玩下嘅心態,你點會留意到佢哋?但就係呢啲細節決定你彈得好唔好聽。

3. 懶鬼

「明白咗,練起上黎會易啲架?」

學結他理解結他嘅樂理同原理係好重要。但係過份注重理論樂理,有機會會阻礙你嘅進步,因為好多時都係做到咗你就明,而唔係掉返轉。所以唔好理咁多,快啲拎起結他同拍子機啦!

4. 藉口鬼

「我呢個星期好忙,無時間練呀。」

越無時間,要用最少時間練最多既嘢,練習嘅方法就越重要。如果漫無目的咁練習,次次由頭彈到尾,一嚟會花好多時間,二嚟你練到嘅嘢唔多。試下定個小目標,每次練二至四個小節,五分鐘都練到唔少次,每日練五分鐘,一個月一首,無難度。


知道咗之後,各位想彈得好嘅同學仔就嚟捉纏住自己嘅隻鬼吧!最後,如果你都係唔知自己可以點樣進步,不妨請教下你哋嘅導師,一齊去定一啲清晰嘅目標啦!

編輯
Harry Ho
Editor
峰弦商店店長
偶有Fingerstyle作品 偶有自家創作
會花錢買裝備 沒錢買粉絲買Like
所以請不要追隨我的步伐 請追隨我的IG
多謝合作
IG:@agravic_rabbit